Титульная

Биография

Фотографии

Воспоминания

Произведения

Вечер памяти


"Комбо кочкаш йодеш"



Ме – Юрик, Валерик, мый да аваже – кудвечыште пум пÿчкедена. Юрик ден аваже пÿчкедат, мый шелыштам, а Валерик мыйын шелыштмем оптымо орашке издер дене шупшыкта. Варажым пöрт гыч изирак-влакыштат – Нина, Лида, Зоя – «полшаш» лектыч. Издер дене иктышт весыштым шупшкедылыт, шÿкедылыт, юарлат… Нунылан пеш весела.
Кенета пулдыр йымал омса денла кылде-голдо, голт, голт, голт! шокташ тÿҥале.
- Мо тыгай?
Ончал колтышна… Öрын шогална!
- Авай, комбо пулдыр омса суравочым шупшкеда! – Юрик ойла.
- Комбо кочнеже! – Нина ешарыш.
Чынак, комбо-влак пулдыр омса дек кумытынат миен шогалынытат, иктыже суравоч кылым пурлын, пеш шупшкеда:
- Кылде-голдо, голт, голт!
- Чынак, нине кочнештыс? – манеш аваже. – Таче вет кечваллан але пуэн омыл.
Жап латкок шагатым эрталтен ыле.
Аваже пилам Юриклан кучыктышат, комбо-влакым пукшаш кайыш. Пулдыр йымалан пукшышаш шемшыдаҥ пырчым оптымо, тушеч луктын эре чыве-комбо-влаклан пукшымо. Пырчым луктын пуымекак комбо-влак пеш шужышын чÿҥгаш тÿҥальыч, тушкак чыве-влакат вÿтамбач чоҥештен волышт.
- Нинышт йодын огыт мошто, - Валерик воштылеш.
- А нуныт суравоч кылым шупшкедаш шÿйышт ок шу, - ойла Лидаже. Шкеже воштылеш.
Меат воштылына. Кузе от воштыл? Пукшен шуктен отылат, комбо тыланет шке шижтара!
- Логаржым ок ондале! – воштылеш Юрик. – Чылт книгасе гай! Книгаште только имне шке ойгыжо нерген калыклан чаҥым кырен каласен пуэн. Тугеже лийынат ала кертын?



С.М. Кушаков
7 январь 1960 ий