Титульная

Биография

Фотографии

Воспоминания

Произведения

Вечер памяти


"Мумо окса"


(Зоян ойлымыжо)

Икана ме – Нина, ачам да мый – Звениговыш кайышна. Звениговышто ятыр коштмек, ик магазиныш пурышна, тыште шуко платье ыле. Ачам мыланна платьым ойыркалаш тÿҥале. Еҥ-влакат кенежлан йöралым пеш налыт. Кенета, мыйын воктенем шогышо ик ÿдыр, ала руш ала марий ыле, шовычшо гыч оксам луктын шуыш. Оксаже кум тенгаш ыле, мый тудым нальым. Тунамак ачамлан ойлышым:
- Ачий, - маньым, - мый оксам муым, кум тенгаш. Теве тиде ÿдырын, - ÿдыржым ончыктем.
А ÿдыр тиде жапыште пеш оксажым уже кычалеш: тувыр урваштыжымат пера, йыржат ончылтеш.
- Мом ышташ? – йодам. – Пуаш але уке?
- Шке шинчет, - манеш ачамже. – Шоно.
Мый шонем: «Оксажым веет мый муын омыл, а волтен шумыжым веле нöлталынам? Пуаш кулеш».
Ачам тугак пеш платьым наледа, кеҥежлан халатымат мыланна налнеже. Ӱдыр еҥ коклаште кычалеш, йол йымалнышт уэш-пачаш ончыштеш. Вара тÿгö лектын кайыш. Мый пеш эскерем. Кидыштем окса кормыжем пуйто когарта, пуйто мый тудым шке налынам гай веле чучеш.
- Ачий, пуэмак! – манам адак. – Ӱдыржо пеш жалын коеш. Анят тудат мемнанлак кеҥежланже ковра платьым налнеже улмаш, а ынде оксаже ок сите.
- Шонен муыч мо? – манеш ачам. – Вот молодец! Конечно, пуаш кÿлеш! Еҥын окса дене от пойо.
Мый ÿдырын почешыже куржын лектым. Тудо магазин ончылно рвезе еҥ дене мутлана:
- Тый налынат, - манеш.
-Уке, - манеш тудыжо. – Мый налын омыл.
- Кушто тугеже? Мый чыла кычал пытарышым.
- Теве оксада, наза, - маньым мый. – Ӱлно кия ыле.
- Ну, вот! – мане ÿдыр. Тек нимат ыш ойло, да магазиныш платьыжым налаш пурыш.
- Пуышым, - маньым ачамлан. – Таумат ыш ойло.
Мо кÿлешым наледен лекмек, уремыште ачам ойла:
- Конечно, «тау» мутшым тудо ойлышаш ыле. Но тый «таулан» кöра огыл веет пуэнат. Окса тудо тыйн огыл, а тудын. Тудо ала шкежат тый гаяк тунемше, оксажым ачаже-аваже пуэныт.
- Мöнгышкыжо миймекше вурсат вара, платьыжымат налын миен ок керт ыле, - ешарыш Нина.
- Вот-вот! – манеш ачам.
Мыйын чонем ынде яндар. Еҥын оксажым налам ыле гын, платьемжымат еҥ окса дене налмемла чучеш ыле да платьыжымат чочлан келшышын чиен ом керт ыле. А шке платьем ласка чон дене чием.



С.М. Кушаков
21-ше май 1966 ийыште лийше случай гыч.